رمى الجزمة و اترمى ف المعتقل <أسماء علي>

مبدئيا عشان ماتعتبروش الصورة أو اللوجو ده رأي شخصي .. باأقولكم بكل هدوء مش رأي شخصي ...

...

ابدأ بقى

طبعا كللكم عارفين الموضوع اللي فجأة بقى أهم خبر في الموسم و المواسم القادمة ,, الصحفي العراقي قام لأونكل بوش قاله ياكلب و راح رمى الفردة اليمين من الجزمة و بعدها الفردة الشمال .. و اسم الله على مقامكم كل القنوات العربية و الصحف و المنتديات و الجروبات و المدونات حللت كل حاجة من أول نوع الجزمة لغاية مقاسها .. و قاااال ايه إن الفردة الشمال دي خصوصا هزت عرش المملكة الأمريكية ,ليه بقى .. أصلها خبطت في العلم الأمريكي ..!

معاكم إن (منتظر الزيدي) عمل موقف على الرغم من صغره بس فش غلنا .. و الصراحة أنا جالي شلل رباعي من بوش أفندي اللي طلع من كام أسبوع في مؤتمر صحفي بيقولنا قاااال ايه إن الحرب على العراق غلطة بسبب معلومات خاطئة من المخابرات و إنه بيعتذر

هيهيهيييييييييييه بتعتذر ليييه يا بوش هو انت فاكر انك دوست على رجلنا ..؟

و اللي يُثير الغيظ على حق ربنا إن الراجل رايح يودع جنوده في العراق .. اللي وقفوا جمبه و نهبوا و سرقوا و اغتصبوا و نكلوا .. بس تصدقوا راجل أصيل ..

..

بس يا جماعة مش لدرجة إن العنواين تنزل بقى على غرار النصر .. و انتصرنا .. و بهدلنا .. و النصر لنا و الجزمة لنا طبعا .. و الرمز بقى الجزمة و الجزمة .. و عيب اوووي لما يطلع صحفيين عراقيين يعتذروا عن موقف زميلهم ..

و بجد عيب علينا و احنا وطن عربي طويل عريض لما نفرح و نهلل و مانعرفش نغمض عنينا من الفرحة إن الجزمة جات ف العلم .. طيب ماهو رصاص الأمريكان جه ف ولادنا وأمهاتنا و عجائزنا .. و سجن أبو غريب بيشهد إن في حاجات كتير اوووي جات فينا و حصلت فينا ..

و قمنا قلنا قااال ايه إن الناس مش هتفتكر من عهد بوش الإبن غير موقف الجزمة .. و أنا فاكرة إن كان عندي مرارة على فكرة ..

أولا لازم نتفق على تفكير منطقي طبيعي .. الأمريكان في سبب واضح لكرههم لبوش الإبن غير الحرب اللي عملها .. هما معتبرين سياسته الداخلية سيئة جدا . و الميزانية في عهده سيئة جدا .. يا جماعة هو ده اللي هيفتكروا بيه بوش مش الجزمة ..

ليا صديق أمريكي جميل جدا .. كان بيقنعني إنه هيجبلي شغل و أسافر أمريكا .. باقوله بس انتوا بتكرهوا العرب بعد 11 سبتمبر .. الولد سكت و رد و قالي مين قال ..؟ .. قولتله أغلب الأمريكان .. ابتسم و قالي يمكن ...

يعني اللي عايزة أقوله إن مش الجزم اللي بتصنع التاريخ .. يعني صديقي ده أدان الحرب الأمريكية لسبب واحد إنهم مش عايزين قتلى في صفوفهم و خايفين فيتنام تتكرر .. و مش بيحبوا بوش الإبن عشان سياسته الإقتصادية فاشلة .. لكن الجزمة دي نفرح بيها احنا عشان احنا شعوب بتعمل هوليلة عالفاضي .. قبل ماتهللوا على الجزمة و تفرحوا افتكروا إن (منتظر) معتقل .. (منتظر) اللي كل اللي عمله إن عبر عن غضب عام و رمى جزمة .. ما رماش قنابل و لا صواريخ و لا قتل العجائز و لا اغتصب النساء و الرجال و الأطفال ..

قبل ماتهللوا افتكروا إن الراجل ده اللي مالقاش حاجة يعملها غير انه يرمي الجزمة مرمي في المعتقل و ضلوعه متكسرة..

آآآآه يا أمة ضحكت من سطحيتها و جهلها الأمم ..