داخلة اهوي المدونة وأنفض التراب اللي ملااااها
استنوا أطلع المراتب في الشمس و أشوف العالم اللي معايا اللي عندهم بيات صيفي تدويني
سامعة حد بيقولي فين باقي موضوع هشام طلعت
هاقولكم مش هاكمله لأني مش عايزة وخلاص و بما إني حد عادي و مفيش مميزات في موضوعي يبقى ادخلوا جوجل و اكتبوا اسم هشام وهتقروا اللي عايزينه
..
ميادة ممكن تجيلي تقولي فين صورة البرتقانة ام ودان اللي اشتريناها مع بعض و كنت هانزل صورتها ف المدونة عشان هي شبه براد الشاي
يؤسفني أقولها إن البرتقانة فُقدت في ظروف غامضة و مريبة ..!
...
هتيجي سمسم الصغيرة وتقولي مانزلتيش ليه صورة النودلز اللي بالبيف اللي عملناها و رمناها من كتر روعة طعمها
هاقولها مش عايزة أفتكر حاجة عن اليوم ده ..!
....
هاسمع ناس بتقول اومال انتي جاية تعملي ايه
هاقولكم باشمس المدونة بس
...
و اللي يعرفوني عارفين إني ليا شهر طريحة الفراش و مش عارفة أركز في أي حاجة
...
النهاردة قررت أصحى بدري ف اجازتي و أشرب القهوة و بعد ماشربتها جالي اشراق مفاجئ و قررت أنطلق شوية بس بالراااحة
....
و كمان طفشانة من مدونتي و قررت أعمل حاجة رهيبة فيها
لأ لأ موش هالغيها طبعا
بس نويت أعمل التسميات عشان يتكتب على القصص إنها قصص من الخيال
بمعنى إن اللي عايز يناقش شخصيات الأبطال مايوجهليش أي ضماير مُخاطبة
و اللي هيركز إنها قصة ممكن يناقش مستوى الأسلوب الأدبي لكن مايقيمش الأبطال أخلاقيا و لا يحكم عليهم كأنهم شخصيات واقعية
على الرغم إن الواقع بيبقى خيال أكتر من الخيال
و اشي خيال والله ..!
...
بالنسبة للأحوال العامة
مش جايلي مزاج أناقش أي حاجة لأني مش طايقة روحي من الأحوال العامة و خليني عاملة نفسي مش واخدة بالي ..!
....
كلمة أخيرة محشورة في زوري بالعرض
إلى الأخوة اللي بيردوا ف المدونة التانية
أنا مش بطلة قصصي و حياة سكومونص يا برنس
و ماحدش يتسائل عن هوية سكومونص لأني ماعرفوش
....
كلمة بعد الكلمة الأخيرة
(عيون) المنتدى اللي حبيته أكتر من أي حاجة
و اللي اتقفل لظروف مش عايزة أفتكرها
بجد كانت أحلى أيام فيه
بس زي ما قلت لبنوتة لما سألتني هو مش هيفتح تاني
قولتلها
عيون كان حاجة حلوة اوووي صعب إنه يبقى غير حلم
و بما إنه كان واقع يبقى من روعته كان ابن موت ..!
.....
إلى أحلى بنات عرفتهم ف الدنيا و هما الشركا في جريمة المدونة دي
سلسبيل و مروة
بجد انتوا من أحلى الحاجات في دنيتي
و صباحكم سكر
و صباحنا سكر
و كل أيامنا سكر في سكر
و ربنا يبعد عننا النمل ..!
هناك 6 تعليقات:
والله انتي اللي صباحك شهد ياسمسم
قلقتيني عليكي اوي وانا قاعده اقول اسماء خلاص وصلت ونسيت بقي صوحابها وسحور رمضان اياه
كانت ايام حلوة تصدقي
مشكله الايام الحلوة انها بتتعتق
وبتزداد حلاوة كل ماقدمت وبعدت المسافه بينا وبينها
معرفش ايه سر النظريه لحد دلوقتي
بس لو فيه طريقه نقدر نجتر بيها الايام لحلوة ..تبقي حاجه فانتاستيك..بما اني صيدلانيه تحت الانشاء..ف يوم م الايام ان شاء الله هعمل انقلاب في مهنه الصيدله ممكن يؤدي الي الغاء كليات الصيدله ف العالم لان مستحيل بعد كده حد يطلع منها بعبقريتي :):)..واخترع دوا يطول عمر الايام الحلوة ويحميها م الشيخوخه
ويحمينا بالمره
ايييه الرغي بتاعي ده
فكريني ابقي احكيلك علي حكايه جديده..زي حكاياتنا القديمه..بس اجمل منها شويه..ويمكن نهايتها المرادي تختلف
اشوفك بخير دايما يا صحبتي
ولا خليني اقول ياتوأمي
مانتي عارفه اننا اصلا توأم لكن مش من نفس الاب والام..
من اجل مصر
شارك في الحملة الشعبية للقيد بالجداول الانتخابية وادعو غيرك
ضع بنر الحملة علي مدونتك
البنر موجود علي مدونتي
اذا كنت ترغب في وضعه علي مدونتك ارسل ميلك كي ارسل لك كود البنر
ارجو المعذرة للدخول بلا مقدمات لأني ادخل علي مئات المدونات يوميا
سلسبيل
شريكتي العزيزة المُختفية أكثر مني على الرغم أنكِ لم تستعيري طاقية الاخفا التي تخصني
!!!
غريب والله غرييييب
....
أنا ماقدرش أنسى أحلى أيام رمضان اللي كنّا بنقضيها مطبقين .. اتنين يطلعوا الشغل مطبقين و واحدة تطلع الجامعة مطبقة طبعاااا
ههههههههههههه بجد كانت أيام مالهاش حل ... لعلمك بعد كده السهر للصبح من غير لمتنا مالوش طعم أصلا ..
نظرية تعتق الأيام الحلوة و جمال الماضي
هممممم تلك النظريات العجيبة التي لا تستند على دليل علمي سوى تجاربنا لمذاق الحياة ..
ههههههههههههه بصي يا مي أنا حاسة انهم هيقفلوا الصيدلة قبل ماتخلصيها عشان الأمن القومي من اخترعاتك
أصل مثلا تصوري لما الشعب يجتر الأيام الحلوة و تلاقي اللي عايش ف أيام الملك و اللي ف أيام محمد علي و بكده نبقى سيبناها مخضرة للي ف بالك
نيهاهاهاهاها
أنا عارفة إن ده هدفك بس على مين سونة لا ينسى شعبه اتشلاااقا
قال أيام حلوة قااااال
طبعا سيادتك حكتيلي و أنا حكتلك و لا داعي للتسييح على العام
:))
ربنا يطلعك من امتحاناتك على خير يارب
أشوفك بخير طبعا يا توأمي ههههههههه انتي ناسية مروة كانت بتنهار مننا عصبيا من التشابه ازاي
!!
Die
منور المدونة
و إن شاء الله هنزورك قريب :)
م\الحسيني لزومي
أشكك على دعوتك ...
و بالطبع سنحاول أن نفعل ..
ألف سلامة عليكي يا دكتور والله انا برضه كنت طريح الحياة
سلامي للسيد سكومونص وقوليله محسن بتاع الفانوس بيسلم عليك
وصباحك على طول سكر
إرسال تعليق