!...إنسف حمامك القديم

بناء علي رغبة الانستين المبجلتين اسماء ومروة قررنا نشر هذا البوست..وهو اهداء خاص لكل من اراد نسف حمامه القديم...او اي ركن ف شقته

عارفة ان كتير استغربوا من الإسم...اعتقادا منهم اني بحيي ذكري اعلان قديم او جالي فقدان في ادراك الزمن

تخمينهم مش صح لكن مش غلط اوي.......!!
الاعلان ده علي قد سذاجته لكن نبهني لعده نقط
اهمها طبعا اننا نستعمل سيراميك ليسيكو

الحمام ركن مهم ف البيت دا اكيد... ولما بقي ناقص للذوق والجمال..كان الحل اننا ننسفه..ونبتدي علي نضافه من اول وجديد دا الاعلان اللي بيقول..

اكتشفت ان حاجات كتير كانت مهمه ف يوم من الايام لبعضنا محتاجه نتعامل معاها كده ..علشان نقدر نواصل حياتنا بصورة طبيعيه ومانتحبسش ف الماضي

ساعات بيبقي لازم تضع حد لحاجات معينه ..تنسي احداث وتبطل تعيش في اطارها الضيق..ترمي كل الاشخاص اللي ساهموا ف انك تحس باي احساس سلبي تجاه غيرك او تجاه نفسك.....ننسف الحمام القديم.......محدش فاهم حاجه صح؟

احيانا بيتفرض علينا حاجات احنا مش حابينها بس بنحاول نقنع نفسنا بيها
فيه انواع من الصداقه بتتكون بينا وبين شخصيات معينه ساعات...بتحصل غصبن عننا..بتبقي بحكم الظروف اللي احاطت بينا وجمعتنا مع الانسان ده خد بقي عندك علي سبيل المثال

زماله...قرابه...جيره....زماله سكن والخ الخ..

انا بسميها

induced friendship

وماقصدش الصداقه اللي نابعه من التعامل الطيب و الود والاهتمام ببعض ومساعده بعض بس اقصد النوع التاني اللي بيحصل نتيجه وجودنا مع شخص اكتر من غيره مع انعزالنا عن العالم احيانا ممكن يقنعنا ان دي صداقه..بس الحقيقه انها مابتبقاش حقيقيهلان عند اول مطببتقع كل الاقنعه الجميله اللي كننا شايفينها ويبان الوش الحقيقي للي كنا فاكرينهم اصدقاء

ممكن انت تبقي ليك جار او زميل عمل او دراسه..وتلاقيه يقرب منك ويحاول يكسبك..او بمعني ادق يتملقك..ويتسحب لحياتك ويعرف ادق تفاصيلها باسلوب انت من جواك مش حابه وفجاه تلاقيه بيقول عليك صاحبه اللي مالوش غيرك.. بتبتدي انت ترق ليه وتقول يمكن كلامه صح وتحس بنوع من المسئوليه تجاهه..وممكن كمان تصدق انه فعلا صديقك وتبقي ضحيه ليه ويكتشف اللي حواليك ان الشخص ده هو المستفيد الحصري من معرفتك..وسواء بقي ماديا او اجتماعيا مش هتفرق..بس انت بالنسباله وسيله لشئ ما او يمكن حاجه زياده ف حياته عاده النوع ده من الصداقه اللي مش صداقه بتبقي لحساب طرف واحد

فيه ف حياة كل واحد مننا او اغلبنا...اشخاص وصلت درجة اعتمادنا علي وجودهم واهميتهم لدرجه لا تقل اهميه عن الحمام اللي اتكلمت عنه فوق ده

لكن مع الوقت بتلاقي العلاقه اخدت منحني غريب جدا بسبب المشاكل اللي بتواجه الطرفين واللي بتظهر نوايا واحد منهم كل مازادت المصاعب اكتروكانك عندك حمام فيه سيفون بينقط وحنفيه سايبه وبلاط مفكفك..وحوض مسدود...وبيطلع ريحه وحشه...!!هنا اتحول الحمام من بيت راحه لبيت نكد

كذلك الصداقه الفشنك..بعد مالايام الورديه بتخلص واللي بتكون عادة ورديه لانك بتفضل مقتنع برغم كلام اللي حواليك وبرغم اللي عينيك شايفاه وبتحاول تخدعك..ان اللي معاك ده صديقك...بمجرد مابتبتدي تفهم حقيقته من تصرفات صعب تكون مش مقصود منها جرحك والتعبير عن الاستهتار بمشاعرك...بتحس انك زي ماعبد المنعم مدبولي الله يرحمه قال...حمارٌ... كبيرٌ..مش غزالٌ يهبلٌ

بتبقي قدام كذا اختيار

يااما تكون عندك الشجاعه الادبيه الكافيه انك تواجه الشخص ده وتعبرله عن ضيقك من انانيته او تصرفاته الجارحه وعدم مراعاته لحقوق الصداقه بينكم وتطلب منه يراجع نفسه..ودا منصحش بتنفيذه لو كنت جربته قبل كده ومانفعش او كنت جربته وفوجئت انه ماتقبلش كلامك وبالعكس اتقلب اكتر عليك

الحل التاني انك تواجهه برضه بس تكون عندك شجاعه اكبر انك تعلن انك هتقاطعه لان من الصعب جدا انك تستمر في التعامل مع انسان بيكنلك المشاعر السيئه دي وبيسمي نفسه صحبك بالعافيه..لان الصحوبيه مش بالكلام وبس ولا الاخد وبس

يااما تنسحب ببساطه ..وتسيب العلاقة بينكم بلا اسم او هوية..والايام كافيه لقتلها لان مبقاش فيه احساس يرويها

المهم انك في خلال تنفيذ اي حاجه من التلاته اللي فوق انك زي ماكنت قادر تخرج الشخص ده من حياتك..خرجه من تفكيرك..يعني الله يكرمك بلاش حكايه اغنيه ظلموه كل شويه

عاااا فلان عمل كذا فيا

وعااااا انا كنت عملتله ايه يعني.

وعاااااا ماليش دعوة انا دمي محروق م اللي قاله عليا امبارح

.خلاص بقي.دور علي اقرب باسكت وارمي فيه فلان بعمايله..لان عياطك عمال علي بطال ده ده دليل علي انك مازلت حبيس الماضي..افتكر في كل مره انت سبت الشخص ده ليه واعرف انك كل ماتطلعه من دماغك انت اللي كسبان

وشوف في كل مره تصرفاته اللي بيعملها عشان يستفزك او يجرحك ويثير مشاعرك وقول ف نفسك..دا مش صحبي ولا عمره كان صحبي وعمره مايستاهل انه يشغل اي حيز من تفكيري لانه خدعني...الصاحب مابيعملش كده...شيل من دماغك انه ممكن يتصلح لانك لو حطيت كده ف بالك بعد كل اللي قلته فوق يبقي هتستني كتير وبعدين الحياة مش هتقف علي حد وماتقولش صعبان عليا الايام الجميله بتاعت زمان..لانها كانت جميله بس لما كنت بتغمي عينك عن الحاجات الوحشه اللي محدش كان بيتجاوز عنها غيرك

مش معقول الناس كلها تكون حواليك وتبقي حياتك قائمة علي شخص واحد..دا يبقي الهطل بعينه

هات ورقه واكتب اسمه فيها بعدد المرات اللي بتفتكر خيانته ليك في اليوم واقطعها..احرقها..ارميها ف البحر..ابلعها...طبعا دي مش دعوة لممارسه الفودو ههههههههههه

اعتبر الاسم ده مامرش ف حياتك ..واعرف انك تستحق افضل من كده المهم تختار صديق صح مش حسب الظروف

بووووووووووووووووووووووووووووووووووووووووووووم
ماحدش يقلق

دانا كنت بنسف حمامي القديم