الأربعاء، 23 يوليو 2008

الحظ لما يواتي يخلي الحرامي سياسي





مستحملاااااااك أناااا

و مدوقااااااك هناااا

تااااخد ومابتديييش


ده اللي يلاقي الدلع

هيعمل البدع

هيتمرع ويعيييييش


****

الأغنية الجميلة دي كانت في البوم سميرة سعيد الجديد

أنا أول ماسمعتها حصلتلي حالة من التأثر والدمعة فرت من عيني


مش عيزاكم تفهموني غلط ..!


أنا حسيت إن ده شعوري ناحية عمو حسني

و ناحية الحكوووومة

ومع المقطع المؤثر اللي بيقول



فيييييييين

حنيتك عليا فيييييييين؟؟



و على فكرة سوسو و فوفو وبنت خالتهم شاهي بيهدوا الأغنية دي برضه لعمو حسني


وطول الليل يعيطواااا و يسحبوا مناديل من الكيس ابو جنيه وربع ده من كتر ماهما حاسين بالقساوووة


المهم فضلوا يا كبدي عليهم طول الليل عياااااط و ذكرياااااات



سوسو: اهئ اهئ فاكرة يا فوفو لما عمو حسني أول ماجه و هو لسا حليوة وشعره أسود و كان أحلى من صورة علبة الجبنة اياها؟؟



فوفو:اهئئئئئ اهئئئئ و دي حاجة تتنسي ده أيامها قال إنه هيقطع الفاسد حتت .. و هيمسك الليلة فترتين ده آخره أصل الكفن مالوش جيوب و لا فيه خزنة في التُربة اهئئئئئئئئئئئ



سوسو: لأ ماهو طلع عند جيمي بدل الخزنة .. ألف خزنة ..!


****


نعمل كادر كلووووووز على اتنين نازلين من العمارة لابسين نضارات سوداااا


دول سوسو و فوفو الصبح رايحين الضرايب عقبال آمالتكم و النضارات لزوم تغطية العنين اللي زي الكبدة من العياط طول الليل


نعمل كلووووووز بوادننا مش بالكاميرا ونسمعهم بقى


سوسو: تتوقعي في الضرايب هيقدروا إن الشقة دي ورثناها من بابا وماما الله يرحمهم .. وإننا مش ذنبنا إنهم قدروها بالمبلغ اللي فوق النص مليون ده ؟؟


فوفو: طبعا هما هيقتنعوا طبعا اننا ورثناها ..

لكن مش هيقتنعوا اننا ماندفعش الضريبة..!


سوسو: اهئئئئئئئئئئئئئئئئئئئئئئئئئئئئئئئ


*****


سوسو و فوفو في مكتب مليان ورق وملفاااااااات


و واحد قاعد ورا المكتب قاعد بيسمعهم و هو مبتسم جدااا اوووي خالص


وبعد ماشرحوا انهم حاليا عايشين من المعاش ومالهمش اخوات ومالهمش مصدر رزق و ان مش ذنبهم ان الشقة دي في مكان اعتبرتوه غالي .. وان ماعندهمش املاك غيرها



المبتسم:


اممممممممم فاهم يا فندم طبعا .. خلاص أجروا كام أوضة وادفعوا الضريبة ..!


سوسو: نعمممممممممممممم؟؟؟؟؟

(في بالها بتقوله: وحيااااااة امك ياخويا؟؟)



المبتسم:


خلاص بيعوهاااااااا


فوفو زغرتله :

طيب ماجارنا عنده تلات شقق تمليك و ماجالوش ضريبة عليهم ؟؟



المبتسم وهو بيبتسم اووووي لغاية مابان البلعوم:


يبقى ماعندوش شقة عدت النص مليون يا آنسة


سوسو و فوفو :

ياراااااااااااااااااجل


تصدق صعب علينا اوووووي




بوووووووووووووووووووووم


***



لأأأأأأأأأأأأأأأأأأأأأ


ماتفهمووووش غلط


هما بس اغمى عليهم


وكل قانون غالي من اونكل يوسف غالي وانتوا طيبين


وكل سرقة ونهب واحتكار و اعتقال وقانون طوارئ واشي ارهاب و عمو حسني من اللي على نفسنا قاعدين


!!!!!!


و سمعني سلااااااام اللي راااااااح ومااااجشي

واللي عن حزني ما دراشي ....!!



هناك 10 تعليقات:

Ahmad Abdulatif يقول...

ايه الجمال دا يا اسماء !
وللا بلاش جمال ، ايه خفة الدم دي!
أنا شايف وش جديد ما كنتش أعرفه قبل كده !
بوست جامد بجد ، باهنيكي عليه
وابقي سلمي لي علي أونكل بوسني ، قصدي حسني ، بس النخزة لوحت لساني !!!

Ahmed Othman يقول...

دعيني هنا أستقبل وجه جديد لأسماء علي
وجه لا أعرفه
و لم تذكره بأسرارها
ربما لأنه لم يعد سرا

و تحية لشريكتيك المبدعتين
سلسبيل و مروة يس

يبدو ان قراركن (مش هنسافر)
لن يكون اختياريا
و ربنا يستر علينا أجمعين

تحياتي

داليــــا يقول...

هم من ناحيه هيسافروا فهم هيسافروا يا وجه
بس سفر لجوه من لبره
وما ادراك بقى ايه هو السفر الجوانى
مالوش قرار
ربنا يابنى ما يكتبه على حد
بس مظنش طول ما احنا فى البلوج دا

أسماء علي يقول...

الصديق العزيز جدااا
أحمد عبد اللطيف

ده أنا نزلت البوست وقلت ربنا يستر

احم احم

أصلي كتبته بسرعة وكنت حاسة دمي يلطش بس بجد القانون بتاع الضرايب ده جايبلي فشنكاح ..!

بالنسبة للوش الجديد

الحقيقة إن للجنون وجوه عديدة

والمجنون اللي زيي مرفوع عنه القلم

بجد أول رد منك خلاني فرحاااااانة جدا على الرغم من عمو أووووسني

ههههههههههههههههههه

وبلاش النخزات اللي بتلوح لسانك ياأحمد أصل بوسة عمو زي لدغة العقربة

منووووووووورني

وربنا مايقطعلك عادة في التواجد هناااااااااا

أسماء علي يقول...

وجه جديد

الأخ الدائم د\أحمد

يا فندم ليه بس ماتعرفش الوجه ده

هو أنا مش زمان في عيون كنت لاجئة في زغللة برضه؟

على العموم كنت أفضل إنه يفضل سر عشان اخوننا البُعدا

بس ميييييييييين

اللي لسانه مسحوب زيي مايعرفش يداااري حاجة

و أنا أحب أضم صوتي لصوتك و أحيي الشريكتين الإنتحاريتين

سلسبيل اللي هي (مي)
و مروة يس اللي هي (crazmania)

.......
اتشلاااااااقا قرار السفر اختياري

بس هما هيخيرونا بين السفر والمعتقل

ههههههههههههه

و ابقى افتكرني بالجبنة الشيدر والعيش أصلي ماليش في الحلاوة

منورني جداااااااا يا دكتور ..

أسماء علي يقول...

دالياااااا

يا دودي يا روحي اللي انتي بتقولي عليه ده مش سفرررررررر

ههههههههههههه

وبعد كده ماله البلوج ده

ده بلوج قمرررررررر

ومسااااالم

وكمان مش أنا اللي باقول

ده فوفو و سوسو

منوراني يا دادا ...

حبيبـــــــة القمـــــر يقول...

ياخبر يا سمسم
بقى انا اقولك نزلي بوست
تقومي منزله قنبله وتفجريها مرة واحده
طب بالهداوة علينا يابنتي
كده تزعلي الناس الجمال دي منك
وبعدين يودوكي مارينا واحنا عايزينك
بس تصدقي فكرتيني بيوم مارحت اعمل الاقرار الضريبي اول مرة قالو اني معفيه ومش هيدفعوني حاجه
وجالي مبلغ محترم
تاني مرة عملته بردو غصب واقتدار
وقالولي ان المفروض هما اللي يدفعولي فلوس يمكن من باب التعويض او التريقه ماعلينا
المهم يعني انهم ناس زووووووووق زووووووووووووق زوووووووووووووق الصراحه
وربنا يورينا يوم في القانون واللي اخترعوا
احم
يوم حلو طبعا عاااااااااااااا

أسماء علي يقول...

حبيبة القمر

ههههههههههههههههههه

يعني يا شوشو مش انتي اللي كنتي عاوزة بوست جديد ..؟
أقولك لأ يعني ..!

وبعد كده الناس الحلوين مش هيدوني مارينا بقى

لييييييييييه

عشان اللي بيسرق بيروح مارينا على رأي الفيلم ههههههههه

لكن أنا ممكن يودوني أماكن أحلى بكتيييييييييييييييييير


اه هو المفروض ان أول خمس سنين في أي مشروع بيبقوا اعفاء ضريبي لكن في حاجة اسمها ضريبة عقارية للأماكن التجارية ده غير الضرايب العادية

ههههههههههههههه

هي دي مصر يا عبلة ضريبة جوه ضريبة جوه ضريبة

والعلبة بقى فيها ضريييييييبة

هما ناس ذووووووووق ذووووووووووووووق فعلااااااااااااا

هههههههههههههههه

ربنا يورينا فيهم سنين مش يوم

بس أنا تمنياتي بسنين سودا على دماغهم

:)

منوراني يا قمر

عمرو عز الدين يقول...

بمناسبة سميرة سعيد اللي في أول البوست أحب أقولك أن الوضع اللي بقينا فيه هو : وضع ميئوس منه..

قانون ضرايب جديد و قانون مرور جديد و عقبال قانون الكمبيوتر.. اللي عنده كمبيوتر يدفع ضريبة، و اللي عنده لاب توب يبقى سنة اللي خلفوه سوداو هيدفع بالدولار..

خليهم يبيعوها أحسن لهم و ياخدوا شقتين حلوين في (مدينتي) دي حتى مدينة عالمية على أرض مصرية.. و ربنا يكرمهم بلطيفة تطلع تغني لمدينتي زي ما غنت لمارينا قبل كده..

بس اللي غايظني بقى و متزعليش مني الواحد بيقول اللي ليه و اللي عليه، فييييييييييييييييييييييييييييييين كيس المناديل أبو جنيه و ربع ده ؟!!

عندنا بجنيه و نص.. و أنا بقى كبرت في دماغي و عاوز الربع جنيه الفرق..


مدونة جميلة و يمكن معلقتش قبل كده بس زرتها و عجبتني و هألبد لكم فيها قريب لو تسمحن يعني :P

و يجعله عامر

أسماء علي يقول...

عمرو باشا عز الدين

انت مخلص كل الألبومات اللي في السوق يا باشا ولا ايه ؟؟
ههههههههههه


يا باشا وبعد البراءة المشبوهة للأخ ممدوح

الواحد خلاااااااص هايطق

أنا من رأيي يا عمور حاجة

هما شكل الشعب خانقهم

ممكن يبيعوا الشعب

أسهل اووووووووووي الصراحة

هو كيس المناديل وصل جنيه ونص

يالهووووووووووووووي

دي كملت يا خويا كملت